Elín Vigdís Guðmundsdóttir, formaður Sáttar, hagsmunasamtaka um átraskanir, verður með fræðslufund í Landakirkju á morgun, þriðjudaginn 1. september frá klukkan 15:00–17:00.

Markmið heimsóknarinnar er að miðla fræðslu um átraskanir og gefa fólki kost á samtali. Átraskanir geta verið lengi til staðar án þess að sjást utan á fólki og haft víðtæk áhrif á bæði líkamlega og andlega heilsu.

Elín hefur meðal annars bent á að skömm verði oft til þess að fólk glími eitt við vandann og leiti sér ekki aðstoðar. Átröskun geti í upphafi orðið eins konar bjargráð við erfiðum tilfinningum eða áföllum en með tímanum þróast yfir í alvarlegan heilsuvanda.

Fræðslufundurinn í Landakirkju er opinn þeim sem vilja kynna sér málefnið betur eða telja sig geta haft gagn af fræðslu og samtali.