Íslandsbanki varar við svikasímtölum þar sem hringjendur þykjast vera starfsmenn bankans og biðja viðskiptavini um að auðkenna sig með rafrænum skilríkjum.

Í tilkynningu frá bankanum kemur fram að borist hafi tilkynningar um slíkar svikatilraunir. Í símtölunum sé því haldið fram að grunsamleg virkni eða innskráning hafi átt sér stað í netbanka viðskiptavinar. Í kjölfarið sé viðkomandi beðinn um að auðkenna sig með rafrænum skilríkjum.

Bankinn hvetur viðskiptavini til að samþykkja ekki óvæntar beiðnir um auðkenningu með rafrænum skilríkjum.

Þeir sem fá slík símtöl eru hvattir til að leggja á og hafa samband við Íslandsbanka í síma 440 4000 ef vafi leikur á hvort símtalið sé í raun frá bankanum.