Söngvarinn Hafsteinn Þórólfsson kemur fram á tónleikum í Eldheimum föstudaginn 30. október klukkan 20.30, á Safnahelgi í Vestmannaeyjum. Þar flytur hann valdar eyjaperlur og fleiri falleg lög við undirleik Einars Scheving, Magnúsar R. Einarssonar og Þóris Ólafssonar.

Hafsteinn á að baki yfir tuttugu ára feril sem atvinnutónlistarmaður og hefur fengist við fjölbreyttar tónlistarstefnur, bæði sem söngvari og tónskáld. Hann hefur meðal annars sungið með Sinfóníuhljómsveit Íslands og tekið þátt í aðalkeppni Eurovision sem bakrödd. Hann söng einnig á plötu Bjarkar, Medúlla, sem var tilnefnd til Grammy-verðlauna árið 2005.

Hafsteinn lauk meistaraprófi í söng frá Guildhall School of Music & Drama í London árið 2005. Hann lauk jafnframt BA-prófi í tónsmíðum frá Listaháskóla Íslands árið 2011 og meistaraprófi í rytmískum tónsmíðum frá Det Jyske Musikkonservatorium í Árósum árið 2015.

Sterk tengsl við Vestmannaeyjar

Hafsteinn á sterkar rætur í Vestmannaeyjum. Langafi hans í móðurætt var Oddgeir Kristjánsson, eitt ástsælasta tónskáld Eyjamanna. Amma Hafsteins, Hrefna Guðbjörg Oddgeirsdóttir, var dóttir Oddgeirs og móðir Söru Hafsteinsdóttur, móður söngvarans.

Lög Oddgeirs skipa sérstakan sess í tónlistararfi Vestmannaeyja og Hafsteinn hefur sjálfur lagt rækt við þann arf með flutningi og útgáfu laga hans. Hann var meðal liðsmanna Tríós Glóða sem gaf út plötuna Bjartar vonir árið 2011. Á henni má heyra bæði þekktar söngperlur Oddgeirs, svo sem Ég veit þú kemur og Ágústnótt, og minna þekkt lög tónskáldsins.

Því má segja að Hafsteinn hverfi að nokkru leyti aftur til tónlistarlegra heimkynna sinna þegar hann stígur á svið í Eldheimum fyrir gesti Safnahelgar. Með honum verða þeir Einar Scheving, Magnús R. Einarsson og Þórir Ólafsson og saman bjóða þeir upp á tónlistarstund þar sem eyjaperlur og fleiri falleg lög fá að njóta sín.

Tónleikarnir verða föstudaginn 30. október 2026 klukkan 20.30. Húsið verður opnað klukkan 20.00 og öll eru velkomin meðan húsrúm leyfir.

Dagskrá Safnahelgar:

Fjölbreytt fjögurra daga menningarveisla

Safnahelgin í Vestmannaeyjum verður haldin dagana 29. október til 1. nóvember með fjölbreyttri dagskrá fyrir alla aldurshópa. Meðal viðburða eru tónleikar í sundlauginni, bókakynningar, myndlistarsýningar, hrekkjavökufjör og ljósmyndasýningar. Sérstök athygli verður vakin á því að á næsta ári verða 400 ár liðin frá Tyrkjaráninu. Safnahelgin hefur um árabil verið fastur liður í menningarlífi Vestmannaeyja og […]