Nýr kjarasamningur fyrir sjómenn á smábátum var undirritaður í morgun. Samkvæmt honum greiða útgerðir 3,5 prósenta framlag í tilgreinda séreign sjómanna. Þetta er fyrsti kjarasamningurinn fyrir smábáta frá árinu 2012.

Sjómannasamband Íslands undirritaði samninginn við Landssamband smábátaeigenda og Samtök smærri útgerða. Fram kemur í tilkynningu Sjómannasambandsins að samningurinn sé í anda kjarasamningsins sem sjómenn gerðu við Samtök fyrirtækja í sjávarútvegi árið 2024.

Auk Sjómannasambandsins eiga Félag skipstjórnarmanna, VM – félag vélstjóra og málmtæknimanna og Sjómanna- og vélstjórafélag Grindavíkur aðild að samningnum.

Félagsmenn greiða atkvæði að lokinni kynningu

Samningurinn verður nú kynntur fyrir félagsmönnum og fer að því loknu í atkvæðagreiðslu. Hann er til ársins 2033 en útgerðir geta sagt honum upp árið 2028 og sjómenn árið 2029.