Annað verkfall undirmanna á Herjólfi hófst núna á miðnætti og stendur í tvo sólarhringa. Það er því ljóst að lítið verður um ferðir í dag og á morgun en allar ferðir Herjólfs féllu niður í síðustu verkfallsaðgerð þann sjöunda þessa mánaðar. Þriðja verkfallið er svo yfirvofandi 21.júlí, 22.júlí og 23.júlí.

Bæjarstjórn Vestmannaeyja sendi frá sér bókuna á fundi sínum í síðustu viku þar sem lýst er þungum áhyggjum vegna kjaradeilu Herjólfs ohf. og háseta, þerna og bátsmanna á skipinu. Það er með öllu óásættanlegt að þjónusturof hafi orðið á samgöngum við Vestmannaeyjar þann 7. júlí síðastliðinn vegnu vinnustöðvunar og að allt stefni í frekari vinnustöðvanir.

Miklar framfarir hafa orðið í samgöngumálum Vestmannaeyja á undanförnum áratug með tilkomu Landeyjahafnar, yfirtöku Vestmannaeyjabæjar á rekstri samgangna á sjó og nýrrar rafknúinnar farþegaferju sérhannaðri fyrir siglingar til Landeyjahafnar.
Öllum ætti að vera ljóst að rekstraraðstæður félagsins eru afar erfiðar. Hagstæð veðurskilyrði hafa verið allt þetta ár í Landeyjahöfn og samfélagið loksins að taka við sér eftir Covid-19. Það er því sorglegt til þess að hugsa að á þessum tímapunkti séu það mannanna verk sem valda því að samgöngur við samfélagið leggist niður með tilheyrandi samfélagslegu tjóni.

Ábyrgð deiluaðila er mikil. Bæjarstjórn Vestmannaeyja leggur þunga áherslu á að deiluaðilar finni leiðir til sátta sem allra fyrst svo að ekki komi til frekari samgöngutruflana fyrir samfélagið og áfram verði veitt eins öflug þjónusta og kostur er hverju sinni.