Sæmdarhjónin Kolbrún Þorsteinsdóttir og Sverrir Gunnlaugsson voru heiðursgestir í Þingvallakirkju í gær við athöfn í tilefni af því að nákvæmlega 300 ár voru liðin frá andláti Jóns Skálholtsbiskups Vídalíns (1666-1720). Sverrir var um árabil skipstjóri á togaranum Jóni Vídalín VE og séra Kristján Björnsson, vígslubiskup í Skálholti, sagði í ávarpi í kirkjunni að Sverrir væri eini maðurinn í Íslandssögunni sem hefði tekist að stjórna Jóni Vídalín!

Í turni Þingvallakirkju er merkileg klukka sem Vídalín biskup gaf á sínum tíma til kirkjunnar og Einar Á. E. Sæmundssen hringdi klukku að sjálfsögðu oft og lengi í tilefni dagsins.

Að athöfn lokinni var ekið eina 20 kílómetra að hryssingsveðri fyrstu haustlægðarinnar í ár að Biskupsbrekku við Uxahryggjaveg þar sem önnur athöfn átti sér stað í tilefni af 300 ára ártíð meistara Vídalíns.

Í þessari brekku andaðist Vídalín 20. ágúst 1720 á leið sinni vestur á Snæfellsnes. Þarna hefur frá árinu verið álkross á minningarsteini frá 1963 en engar heimildir eru um hver hafi komið honum fyrir.

Nú hefur verið komið fyrir veglegum trékrossi í minningu Vídalíns og minnismerki við krossinn eftir Pál Guðmundsson á Húsafelli. Hann fann steininn á Kaldadal og sagði að ásjóna biskups hefði verið þar fyrir en hann hefði einungis þurft að skerpa ögn andlitsdrættina!

Séra Kristján Björnsson í Skálholti stýrði vígsluathöfninni og fleiri tóku þátt í henni, þar á meðal biskupinn yfir Íslandi, séra Agnes M. Sigurðardóttir og séra Geir Waage í Reykholti. Páll á Húsafelli lét á steinhörpuna sína og einn steinninn í hljóðfærinu er helgaður séra Jóni Vídalín og gefur frá sér tóninn E.

Skálholtsfélagið hið nýja beitti sér fyrir því að meistara Vídalíns yrði minnst á þennan hátt, með Erlend Hjaltason stjórnarformann þess í fararbroddi. Vinnslustöðin styrkti verkefnið í minningu Jóns Vídalíns og skipstjóranum á Jóni Vídalín VE var verðskulduð virðist sýnd við þessar áhrifaríku afhafnir í Þingvallakirkju og síðan við Biskupsbrekku.