Undir lok árs 2018 er fastalandinu sleppt og haldið til Eyja þar sem næstu tvö árin skyldi sinna mikilvægu verkefni fyrir samfélagið í Eyjum. Fjölskyldan var áhugasöm að festa búsetu í Vestmannaeyjum enda yndislegur staður. Samfélagið tók okkur opnum örmum og munum við búa að góðum tengslum sem skapast hafa á þessum tíma. Hér höfum við eignast góða vini og munum geyma einstakar minningar og viðhalda góðum tengslum um ókomna tíð.
Sem framkvæmdastjóri Herjólfs ohf., hefur hver nýr dagur verið viðburðarríkur en þessu sérstaka verkefni hefur fylgt nokkuð flókin og erfið viðfangsefni og mörg hver jafnvel poppað upp fyrirvaralaust. Eins vel og hægt var að ganga frá yfirtöku ferjusiglinga verður ekki hjá því komist að nefna þá staðreynd að nánast ekkert gékk eftir eins og til stóð. Seinkun á afhendingu ferjunnar og allir þeir fylgikvillar sem fylgdu í kjölfarið hafa litað þennan rekstrartíma. Undir það síðasta skall, fyrirvaralaust á heimsbyggðina veiurfaraldur sem hefur haft veruleg áhrif á reksturinn. Engu að síður hefur vel tekist til og þjónusta við samfélagið verið bætt verulega. Staðfesta og trú þeirra sem komið hafa að rekstri ferjunnar hefur verið til fyrirmyndar og vænti ég þess að hún verði áfram slík.
Rekstrar- og starfsumhverfi félagsins hefur verið nokkuð sérstakt þennan tíma en engu að síður hefur verið gefandi að takast á við þetta verkefni. Einhverjir sigrar hér og þar en vissulega einhver ágjöf líka.
En ég veit að sú vegferð sem hafin er mun halda áfram og félaginu mun takast að ná þeim markmiðum sínum að bæta enn frekar í þjónustu við íbúa samfélagsins – þeirri vinnu lýkur í raun aldrei.
Starfstími minn í Eyjum hefur einkennst af því að ná settu markmiði stjórnar félagsins þ.e. að bæta þjónustu við íbúa og samfélagið. Þessi vinna hefur útheimt orku og mikinn tíma. Það verður því ekki horft framhjá því að á þessum tímamótum, eftir rúmlega tveggja ára starfstíma, er tímabært að taka nýja áskorun í lífinu og halda upp á fastalandið að nýju.
En þessi tími, þó á stundum hafi verið erfiður, hefur líka verið skemmtilegur og ánægjulegur. Fyrir það ber að þakka. Ég hef fengið tækifæri til að kynnast helstu innviðum samfélagsins, forsvarsmönnum fyrirtækja og stofnana sem eiga allt sitt undir í sínum rekstri, áhugafólki um siglingar og ölduhæð og svo frábærum íbúum sem nýtt hafa þjónustu félagsins. Ég eignaðist meira að segja óvænt pennavin sem ég hef ekki átt síðan ég var 11 ára.
Ég bið ykkur sem samfélag að sameinast um það sem skiptir máli, styðja þá sem skipa framlínuna í rekstri ferjunnar og tryggja sem einn málsvari að þjónusta um þennan eina þjóðveg eða þjóðleið verði tryggð til framtíðar. Það eitt skiptir máli í stóra samhenginu.
Um leið og ég þakka samstarfsfólki mínu, öllu því góða fólki sem sinnt hefur stjórnarstarfi fyrir félagið, bæjarstjóra, bæjarráði, kjörnum fulltrúum og að lokum öllum íbúum samfélagsins fyrir samferðina og samstarfið í þennan tíma er við hæfi að kveðja með línu úr Þjóðhátíðarlagi ársins 2020 – því vil ég segja, takk fyrir mig – yndislega eyja.

Ég óska ykkur öllum gleðilegra jóla og farsældar á komandi ári.
Guðbjartur Ellert Jónsson