Víðtækara samráð við hagsmunaaðila og allan almenning: Gunnar Haraldsson, formaður starfshópsins Samfélag sem er meðal framsögumanna á fundi, Auðlindin okkar sem verður í Akóges kl. 17.00 á morgun, þriðjudag og er öllum opinn.

1. Hvert er takmarkið með vinnu starfshópsins og hvaða leiðir hafið þið valið til að ná settu marki?

Hlutverk okkar er að leggja mat á ýmsa þætti er snerta sjávarútveg. Þessir þættir sem okkur er gert að skoða eru fjölmargir og tengjast ýmsu, bæði innan og utan sjávarútvegsins. Okkur er gert að skoða sérstaklega þjóðhagslegan ávinning af fiskveiðistjórnunarkerfinu og bera saman við önnur lönd, ekki bara hvað varðar efnahagslegan ávinning heldur einnig sjálfbærni. Þá ber okkur að skoða félagslega þætti s.s. stöðu strandbyggða, samþjöppun veiðiheimilda og skattspor. Síðast en ekki síst er okkur gert að skoða möguleika til aukinnar sáttar um fiskveiðistjórnunarkerfið.

Til að ná utan um verkefnið höfum við reynt að afmarka það, safna gögnum og upplýsingum og fá sem gleggsta mynd, bæði af kerfinu og þeim þáttum þess sem styrinn hefur einna mest staðið um. Í þeirri vinnu höfum við átt mjög góð samtöl við aðila sem tengjast greininni og viðfangsefnunum, bæði beint og óbeint. Verkefni okkar er svo að vinna úr þessum upplýsingum og leggja mat á stöðuna.

2. Hverjar hafa stærstu áskoranirnar verið í vinnu hópsins og hvernig hafið þið kosið að takast á við þær?

Áskoranirnar eru margar og margþættar. Helsta áskorunin er ef til vill fólgin í því að átta sig á hinum ólíku sjónarmiðum sem uppi eru og á hverju þau byggja í raun og veru. Við höfum orðið vör við að ólíkir aðilar leggja ólíka merkingu í ýmislegt sem tengist viðfangsefnunum, t.d. hvað átt er við þegar talað er um aðgengi að greininni, og svo mætti lengi telja.

3. Viðtökur við verkefninu hafa verið margvíslegar, sumir fagna framtaki matvælaráðherra á meðan aðrir sjá því allt til foráttu. Hverju svararðu þeim gagnrýnisröddum sem heyrast?

Það er skiljanlegt að ýmsir séu orðnir þreyttir á að skipaðar séu nefndir, starfshópar, sérfræðingahópar, samráðsvettvangar og svo mætti lengi telja, enda hefur ekki verið neinn skortur á þeim í gegnum tíðina, án þess að árangurinn af öllu því starfi hafi verið skýr. Á móti kemur að umræða um sjávarútveg hefur alltaf verið í gangi og mun vera áfram í gangi hvort sem okkar starf er hluti af því eða ekki. Hér er þó verið að gera tilraun til að stunda þetta samtal í mun víðtækara samráði við hagsmunaaðila og í raun allan almenning en áður hefur verið. Það er að minnsta kosti von okkar sem að þessu standa að með þessu verði hægt að lyfta umræðunni upp á aðeins hærra plan og byggja frekar á staðreyndum en upphrópunum.

4. Hverjar eru þínar helstu væntingar til fundarins í Vestmannaeyjum? Hvaða málefni langar þig helst til að verði reifuð?

Það er alltaf gaman að koma til Eyja og ég vænti þess að Vestmannaeyingar muni ekki liggja á skoðunum sínum á þessum fundi. Að sama skapi vona ég að sem flestir komi til fundarins með það að leggja eitthvað uppbyggilegt til málanna. Ég býst fastlega við því að það verði farið út um víðan völl á fundinum en ég vona að hægt verði að leggja áherslu á þau atriði sem mestu máli skipta varðandi framtíðina frekar en að tafið sé of lengi við fortíðina.