Staða stoðþjónustu skólaskrifstofu Vestmannaeyja var til umræðu á fundi fræðsluráðs 14. október. Deildarstjóri fræðslu- og uppeldismála fór þar yfir stöðuna með sérstakri áherslu á biðlista eftir greiningum fyrir börn. Farið var yfir umfang biðlista og hvaða greiningar skortir helst.

Í niðurstöðu ráðsins er lögð áhersla á að leitað verði leiða til að stytta biðtíma, forgangsraða úrræðum og bæta þjónustu við börn og fjölskyldur sem bíða eftir greiningu.

„Fræðsluráð lýsir yfir áhyggjum af þeim fjölda barna sem bíða eftir greiningu og þeim langa biðtíma sem hefur myndast,“ segir í fundargerðinni.

Deildarstjóra fræðslu- og uppeldismála var falið að útbúa aðgerðaáætlun sem verður lögð fram á næsta fundi ráðsins.

Ekki kemur fram í fundargerðinni hversu mörg börn eru á biðlista, hversu langur biðtíminn er eða eftir hvaða greiningum þau bíða.