Aron Lucas Vokes, leikmaður ÍBV í fótbolta, verður frá keppni um óákveðinn tíma eftir að hafa slitið aftara krossband í hné í tapi liðsins gegn Þór í síðustu viku. Fótbolti.net greindi frá í dag.

Aron er 22 ára gamall sóknarmaður og gekk til liðs við ÍBV frá uppeldisfélagi sínu, Selfossi, í sumarglugganum. Hann kom til Eyjamanna á lánssamningi sem gildir út tímabilið, en ÍBV hefur jafnframt kauprétt á leikmanninum.

Aron náði að leika átta leiki fyrir ÍBV á tímabilinu og skoraði eitt mark áður en meiðslin settu strik í reikninginn.

Ekki er enn vitað hversu langan tíma Aron verður frá keppni vegna meiðslanna, en endurhæfing eftir slit á aftara krossbandi í hné getur verið löng.