Undirbúningur fyrir sjómannadaginn er kominn á fullt í Vestmannaeyjum. Starfsfólk umhverfis- og framkvæmdasviðs Vestmannaeyjabæjar hefur undanfarna daga unnið að því að fegra Stakkagerðistúnið fyrir hátíðarhöld helgarinnar.

Kjartan Vidó og hans fólk hafa lagt lokahönd á ýmis verkefni á túninu og meðal annars útbúið glæsilegt blómaakkeri í blómareitnum bak við stóra steininn. Þar er sjómennskunni og sjómannadeginum gert hátt undir höfði með litríku og fallegu fyrirkomulagi sem vekur athygli gesta og gangandi.

Sjómannadagurinn hefur lengi skipað sérstakan sess í Vestmannaeyjum og er Stakkagerðistúnið jafnan miðpunktur fjölbreyttrar dagskrár þar sem bæjarbúar og gestir koma saman til að fagna deginum. Óskar Pétur Friðriksson smellti myndum á túninu í morgun. Á myndinni hér að ofan má sjá akkerið fyrir ofan starfsfólk bæjarins.