Elís Þór Aðalsteinsson, leikmaður ÍBV í handbolta, mun ekkert leika með ÍBV í Olís deild karla á komandi tímabili, þar sem hann er með slitið krossband í hné. Elís staðfesti þetta í samtali við handkastið. 

Hann varð fyrir því óláni að slíta krossband í leik íslenska u-20 ára landsliðsins gegn Danmörku, á Evrópumótinu fyrr í mánuðinum. Það er alveg ljóst að þetta er mikið áfall fyrir ÍBV enda Elís einn af lykilmönnum liðsins. 

Elís, sem leikur sem hægri skytta, var markahæsti leikmaður liðsins á síðasta tímabili þar sem hann skoraði 111 mörk í 17 leikjum.

Í samtali við handkastið segir hann: ,,Tilfinningin að fá þetta staðfest var hræðileg og mikið áfall fyrir mig og fólkið í kringum mig. Næstu skref eru að hitta Örnólf og koma þessu af stað.”