Særún Eydís Ásgeirsdóttir hóf störf hjá Vinnslustöðinni 1997 sem verkakona í fiskvinnslu. Eydís vann í Vinnslustöðinni nær óslitið til dagsins í dag. Tók sér örstutta pásu þegar hún flutti frá Eyjum. Hún hefur verið umsjónarkona á kaffistofu Vinnslustöðvarinnar í ein 10 ár. Eydís fer yfir starfsferilinn og uppvöxtinn í ítarlegu viðtali á Vinnslustöðvarvefnum. Grípum niður í viðtalið:

Í Vinnslustöðinni hefur Eydís fætt og klætt starfsfólkið, passað upp á að allir séu hluti af hópnum, gætt að umgengis- og öryggismálum og tekið einstaklega vel á móti nýju starfsfólki og gætir þess að allir séu jafnir. Hún ber líka hag Vinnslustöðvarinnar í brjósti og er ávallt umhugað um að þar gangi hlutirnir vel fyrir sig.

Fréttaritari vsv.is settist niður með Eydísi í kaffistofunni og ræddi við hana um lífshlaupið og starfsferil hennar í Vinnslustöðinni.

Í upphafi viðtalsins komu fyrrum samstarfsfélagar Eydísar sem leið áttu hjá til að kasta á hana kveðju. Það er morgunljóst að þarna eru félagar á ferð sem sakna þess að hafa ekki Eydísi lengur í hinu daglega amstri í kringum þá.

Þegar Lilja Björg Arngrímsdóttir tilkynnti starfsmönnum að Eydís væri hætt þá rifust þau um það hvern hún elskaði mest. Síðan var Lilja spurð hvort það yrði ekki örugglega partý fyrir Eydísi. Sem svo sannarlega var gert. Sú kveðjuveisla var haldin í liðinni viku.

Fædd og uppalin í Hrunamannahreppi

Eydís er fædd í apríl 1962. Hún er fædd og uppalin í Hrunamannahreppi (á Flúðum). Hún er bóndadóttir. „Pabbi var með kindur og hesta. Ég átti nú bara svona venjulega sveita æsku. Ég vann í sveitinni. Gekk í öll störf sem þurfti að sinna, bæði úti og inni. Smalandi, á hestum, rýja, heyja og allt þetta týpíska sem er í sveit. Ég fór á þrjár sláturtíðir á Selfoss.”

Þegar Eydís kemur til Eyja, þá sautján ára fer hún að vinna í Nöf. Nöf átti þá Óskar Matthíasson. „Ég sagði Óskari Matt að ég væri úr sveitinni og þá var ég ráðin.” Hún var þar á tveimur vertíðum og tekur fram að það hafi verið mjög gaman að vinna þar.

„Það var erfitt. Við unnum mikið, langt fram á kvöld. „Ég var hjá Óskari og Þóru í eina vertíð og hjá Bobbu og Gísla Sigmarssyni seinni vertíðina. Ég kynntist þessum fjölskyldum mjög vel,” segir Eydís.

Allt viðtalið við Eydísi má lesa hér.