Leikmaður ÍBV, Olga Sevcova, hefur verið úrskurðuð í tveggja leikja bann af aga- og úrskurðarnefnd KSÍ vegna atviks sem átti sér stað í leik FH og ÍBV í Bestu deild kvenna þann 20. maí síðastliðinn.

Málið kom inn á borð nefndarinnar frá málskotsnefnd KSÍ samkvæmt ákvæðum reglugerðar um aga- og úrskurðarmál. Um var að ræða atvik sem dómari leiksins og aðstoðardómarar hans höfðu ekki séð í leiknum sjálfum, en staðfest var að atvikið hefði farið fram hjá þeim.

Með erindi málskotsnefndar fylgdu myndbandsupptökur af atvikinu og taldi aga- og úrskurðarnefnd sér heimilt að styðjast við þær við úrlausn málsins. Í niðurstöðu nefndarinnar segir að á myndskeiðum sjáist „greinilega“ þegar Olga Sevcova reki olnboga í andlit leikmanns FH á meðan boltinn sé fjarri.

Nefndin telur um að ræða alvarlegt agabrot sem flokkist sem ofsafengin framkoma samkvæmt reglugerð KSÍ og að háttsemin geti verið hættuleg. „Með vísan til alls framangreinds er það mat aga- og úrskurðarnefndar að leikmaðurinn skuli sæta tveggja leikja banni í Íslandsmóti vegna háttsemi sinnar,“ segir í úrskurðinum.

Leikbannið tekur gildi klukkan 12 daginn eftir birtingu úrskurðarins. Málið var tekið fyrir eftir að málskotsnefnd KSÍ vísaði því áfram til aga- og úrskurðarnefndar. ÍBV fékk frest til að skila inn greinargerð eða athugasemdum vegna málsins, en samkvæmt gögnum nefndarinnar bárust engar athugasemdir áður en málið var tekið til úrskurðar.