Á fundi bæjarráðs Vestmannaeyja í liðinni viku var einu sinni sem oftar umræða um samgöngumál.

Fram kemur í fundargerðinni að á fundi með Vegagerðinni í lok ágúst hafi komið fram að búið væri að bjóða út ríkisstyrkt flug til Vestmannaeyja. Ekki er búið að ganga frá samningi því ríkið hefur ekki tryggt að fullu það fjármagn sem þarf svo hægt sé að ganga frá samningi.

Í afgreiðslu bæjarráðs hvetur ráðið þá ráðherra sem koma að málinu að tryggja það fjármagn sem uppá vantar svo hægt sé að ganga frá samningi um ríkisstyrkt flug yfir vetrartímann eins og lofað hefur verið.