Kvennalið ÍBV í fótbolta vann frábæran 3-2 endurkomusigur á Víkingi Reykjavík, eftir að hafa verið 0-2 undir í hálfleik, í annarri umferð Bestu deildar kvenna á Hásteinsvelli í dag.

Víkings konur byrjuðu leikinn mun betur en þær léku með vindinn í bakið í fyrri hálfleik. Bergdís Sveinsdóttir, leikmaður Víkings, var nálægt að koma gestunum yfir þegar hún fékk boltann í gegn en markvörður ÍBV, Arden Joy La-Rose, varði frábærlega frá henni. Aðeins fimm mínútum síðar fékk ÍBV dæmda á sig vítaspyrnu sem Bergdís Sveinsdóttir skoraði örugglega úr og kom Víkingum í 0-1. Fimm mínútum síðar tvöfaldaði Jasmín Erla Ingadóttir forystu Víkings kvenna þegar hún skoraði af stuttu færi eftir undirbúning Emmu Steinsen. Staðan 0-2 í hálfleik. 

Allison Patricia Clark gerði sigurmark ÍBV

Eyjakonur komu af krafti inn í síðari hálfleikinn og minnkuðu muninn á 50. mínútu leiksins. ÍBV fékk þá aukaspyrnu á miðjum vellinum sem Sandra Voitane tók. Frábær bolti hjá Söndru á fyrirliðann, Avery Mae Vanderven, sem tók hann snyrtilega niður inn á teignum og kláraði svo örugglega í netið. Staðan 1-2. Aðeins mínútu síðar slapp Olga Sevcova í gegn eftir klaufagang í vörn Víkinga. Hún skoraði af öryggi framhjá markverði Víkinga og jafnaði leikinn fyrir ÍBV. Kristín Erla Ó Johnson, leikmaður Víkings, fékk að líta sitt annað gula spjald og þar með rautt, á 64. mínútu og Eyjakonur því einum manni fleiri það sem eftir lifði leiks. Sigurmarkið lá í loftinu hjá ÍBV og kom það á 83. mínútu. Boltinn barst þá á Allison Clark fyrir utan teig Víkinga og hún tók skotið sem endaði í netinu. Lokatölur leiksins 3-2.

Eyjakonur eru eftir tvær umferðir með fullt hús stiga, sex stig, rétt eins og Breiðablik á toppi deildarinnar. Víkingur er í fimmta sæti með þrjú stig. 

ÍBV mætir Val, á Hlíðarenda, í næsta leik sínum í Bestu deild kvenna, miðvikudaginn 6. maí kl. 18:00.

ÍBV 3 – 2 Víkingur R.

0-1 Bergdís Sveinsdóttir (’21 , víti)

0-2 Jasmín Erla Ingadóttir (’25 )

1-2 Avery Mae Vanderven (’50 )

2-2 Olga Sevcova (’51 )

3-2 Allison Patricia Clark (’83 )

Rautt spjald: Kristín Erla Ó Johnson, Víkingur Reykjavík (’64)