- Eyjafréttir
- ·
- Fréttir
- ·
Ritstjórn
Veðurstofa Íslands hefur gefið út gula viðvörun fyrir Suðurland sem gildir frá klukkan 6 til 14 á morgun, þriðjudag. Búast má við austan hvassviðri og mjög snörpum vindhviðum undir Eyjafjöllum sem geta haft áhrif á umferð um svæðið.
Veðurstofa Íslands varar við austan hvassviðri, 13–18 m/s, á Suðurlandi frá klukkan 6 til 14 á þriðjudag. Sérstaklega er bent á að undir Eyjafjöllum og í Mýrdal geti vindhviður orðið mjög snarpar og náð allt að 30 m/s.
Við þessar aðstæður geta skapast hættulegar aðstæður fyrir ökutæki sem eru viðkvæm fyrir hliðarvindi, svo sem húsbíla, hjólhýsi og önnur stór farartæki. Fólki sem hyggst ferðast um Suðurland í fyrramálið er ráðlagt að fylgjast vel með veðurspám og ástandi vega áður en lagt er af stað.
Hugleiðingar veðurfræðings
Í hugleiðingum veðurfræðings frá því síðdegis í dag segir: Suðaustur af Hvarfi er lægð og úrkomubakki frá henni nálgast úr suðri. Suðaustan 5-15, hvassast með suðurströndinni. Rigning sunnanlands en bjartviðri norðan og austanlands.
Á morgun verður suðaustan og austan 5-13 m/s en 13-18 syðst. Víða rigning en úrkomulítið norðaustantil á landinu. Hiti 9 til 19 stig, hlýjast á Norðurlandi. Útlit er fyrir suðvestlæga átt með skúrum á miðvikudag en rigningu um vestanvert landið um kvöldið. Skúrir fimmtudag, einkum á vestanverðu landinu.
Ábending frá Herjólfi
Vegna veðurspárinnar hefur Herjólfur einnig sent frá sér tilkynningu til farþega. Þar kemur fram að spáð sé mikilli ölduhæð í Landeyjahöfn fyrri hluta dags sem geti haft áhrif á siglingaáætlun.
Farþegar eru hvattir til að fylgjast vel með upplýsingamiðlum Herjólfs ef breytingar verða á áætlun. Ákvörðun um hvort grípa þurfi til breytinga verður tekin klukkan 6 í fyrramálið.
