Framkvæmda- og hafnarráð Vestmannaeyja hefur hafnað beiðni Terra um að breyta opnunartíma móttökustöðvar fyrirtækisins við Eldfellsveg.

Arngrímur Sverrisson og Daníel Edward Jónsson, starfsmenn Terra, sátu fund ráðsins þegar málið var tekið fyrir. Terra lagði fram tvær tillögur að breytingum á opnunartíma.

Í fyrri tillögunni var lagt til að opið yrði alla virka daga frá klukkan 13 til 17 og um helgar frá klukkan 12 til 16.

Í síðari tillögunni var lagt til að lokað yrði á sunnudögum og miðvikudögum, en opið á laugardögum frá klukkan 11 til 16 og á mánudögum, þriðjudögum, fimmtudögum og föstudögum frá klukkan 11 til 17.

Framkvæmda- og hafnarráð hafnaði báðum tillögunum. Í bókun ráðsins segir að breytingarnar myndu leiða til verulegrar röskunar á þjónustu við íbúa og fyrirtæki.

Jafnframt bendir ráðið á að opnunartími móttökustöðvarinnar sé tilgreindur í samningi sveitarfélagsins við Terra og beri því að virða samningsbundin ákvæði.