Karlalið ÍBV í fótbolta tapaði gegn Fram í fjórðu umferð Bestu deildar karla á Lambhagavellinum í kvöld. Leiknum lauk með 5-1 sigri Framara.

Framarar byrjuðu leikinn mun betur og komust í 1-0 eftir ellefu mínútur þegar Atli Þór Jónasson setti boltann í autt markið eftir mikinn klaufagang í vörn Eyjamanna. Atli Þór tvöfaldaði forystu Framara á 32. mínútu þegar hann skoraði af stuttu færi, eftir sendingu Fred Saraiva. Staðan 2-0 í hálfleik. 

Þorri Stefán Þorbjörnsson kom Fram í 3-0 þegar fjórar mínútur voru liðnar af síðari hálfleik, eftir misheppnaða hreinsun í vörn ÍBV. Róbert Elís Hlynsson minnkaði muninn fyrir Eyjamenn með stórglæsilegu marki beint út aukaspyrnu á 72. mínútu. Framarar voru hins vegar ekki hættir og bættu tveimur mörkum við fyrir leikslok. Kyle Mclagan skallaði boltann í netið eftir fyrirgjöf og kom Fram í 4-1 þegar stundarfjórðungur var eftir. Það var svo Kristófer Konráðsson sem skoraði fimmta mark Framara undir lok leiks, með góðu skoti úr teignum. Lokatölur leiksins 5-1. 

Eyjamenn eru eftir leikinn á botni deildarinnar með eitt stig. Fram er í fimmta sæti með sjö stig. Tveimur leikjum í umferðinni er lokið en Keflavík sigraði KA á Akureyri, 1-2 í gær og KR sigraði FH á Meistaravöllum, 4-2. Umferðin klárast í kvöld.

ÍBV tekur næst á móti Breiðablik, á Hásteinsvelli, sunnudaginn 3. maí kl. 18:00.

Fram 5-1 ÍBV

1-0 Atli Þór Jónasson (’11)

2-0 Atli Þór Jónasson (’32)

3-0 Þorri Stefán Þorbjörnsson (’49)

3-1 Róbert Elís Hlynsson (’72)

4-1 Kyle Douglas Mclagan (’76)

5-1 Kristófer Konráðsson (’88)