Jón Ari Sigurjónsson er Eyjamaður sem lengst af hefur búið og starfað í Kanada þar sem hann býr nú með fjölskyldu sinni. Hann er fæddur á Strandbergi í Vestmannaeyjum árið 1952 og ólst svo upp á Hólagötu 29 sem foreldrar hans byggðu. Foreldrar hans eru Sigurjón Jónsson, símritari í Eyjum sem fór til Loftleiða sem loftsiglingafræðingur og Ragnheiður Sigurðardóttir frá Stakkagerði. Systkini hans eru Sigurjón Ragnar, Frosti, Íris Ólöf og Matthildur sem er látin.  Þegar Sigurjón byrjaði hjá Loftleiðum flutti fjölskyldan til Reykjavíkur.  Jón Ari býr á Vancouvereyju í Bresku Kolombíu í Kanada. Kona hans er Sigríður Oddný Gunnlaugsdóttir.

„Við eigum tvær dætur, Hjördísi sem er fædd 1974 og Ingileif sem fæddist ári síðar. Við eigum tvær afastelpur ytra og ég á aðrar tvær  sem búa í Eyjum og ásamt einsárs langafastrák. Hjördís og Ingileif  búa hér í Kanada. Önnur á neðri hæðinni og sú eldri í næstu götu. Fjölskyldan talar alltaf saman á íslensku. Við horfum á íslenskt sjónvarp og hlustum á íslenskt útvarp flesta daga. Hjá okkur er þetta eins og að vera í sumarbústað á Íslandi nema að allir tala ensku fyrir utan húsið,“ segir Jón Ari sem minnist góðra daga í Eyjum og lumar á nokkrum sögum frá þjóðhátíðum fyrri ára. Hann heimsækir heimaslóðirnar reglulega og eyddi tíu dögum í Eyjum í vor.

Mynd,

Jón Ari, móðir hans og Sigga þegar Jón Ari varð fimmtugur.

Viðtalið í heild er í Eyjafréttum.