Dýpkun í Landeyjahöfn hefur gengið ágætlega frá því um helgina, en dýpkun er enn háð flóðum. Þetta kemur fram í upplýsingum frá G. Pétri Matthíassyni, forstöðumanni samskiptadeildar Vegagerðarinnar.

„Dýpkun hefur gengið ágætlega síðan á laugardaginn, en áfram er einungis hægt að dýpka á flóðinu,“ segir Pétur. Horfur næstu daga eru þó taldar góðar. „Ölduspá er mjög góð næstu daga,“ segir hann.

Áætlað er að taka nýjar dýptarmælingar síðar í dag sem munu varpa skýrara ljósi á stöðuna í hafnarmynninu. „Dýpið verður mælt síðdegis í dag og þá fæst betri mynd af stöðunni,“ segir Pétur í svari til Eyjafrétta.