Þau mikilvægu og gleðilegu tímamót urðu ( í dag ) mánudaginn 22.ágúst að framkvæmdir eru hafnar á Laufey Welcome Center á Bakka. Í ársbyrjun 2022 var fjármögnun á þjónustumiðstöðinni Laufey tryggð með aðkomu langtímafjárfesta sem hafa mikla trú á verkefninu. Fyrsta stöðin, og sú mikilvægasta fyrir Vestmannaeyjar, mun rísa á Bakka.

Þessi ferill hefur verið langur og strangur, sér í lagi þar sem fjármögnunarferlið keyrði í fangið á Covid og allt viðskiptaumhverfi breyttist á svipstundu. Við fundum þó alltaf mikinn áhuga og velvilja í Vestmannaeyjum, hjá almenningi, bæjarstjórn, stjórn Herjólfs, ferðamálasamtökunum og ber einnig að nefna Lífeyrissjóðs VE sem hvatti okkur áfram vitandi mætavel hvaða þýðingu svona segull og veiðikofi myndi gera fyrir bæjarfélagið og þar með þeirra sjóðsfélaga. Einlægur og auðsýndur áhugi fjölmiðla í Vestmannaeyjum á verkefninu hvatti okkur líka til dáða. Við þökkum öllum þessum aðilum kærlega fyrir stuðninginn.

Jarðframkvæmdir og Landflutningar verða umtalsverðir í undirbúningi fyrir stórt bílaplan, öflugar hraðhleðslustöðvar og myndarlega byggingu, sem hefur tekið breytingum með betri þjónustu fyrir jafnt ferðamenn á Suðurlandi og Eyjamenn á öllu landinu, í huga. Vonir standa til að Laufey verði risin og starfandi, með fána Vestmannaeyja blaktandi við hún, á 50 afmæli eldgossins 1973 á Heimaey.

Teiknistofa TPZ  í Vestmannaeyjum hefur tekið að sér gæðaeftirlit með jarðframkvæmdum næstu vikur og mánuði á Bakka og hefur þegar hafið störf.

Þetta kemur fram í fréttatilkynningu frá Laufeyju.