Kaupverðið er 690 milljónir króna sem felur í sér að útlagður kostnaður við uppbyggingu kerfisins endurheimtist. Þetta kemur fram í tilkynningu á vef Vestmannaeyjabæjar.

Vestmannaeyjabær ákvað á sínum tíma, með stofnun Eyglóar, að tryggja öllum Eyjamönnum háhraða nettengingar þar sem ljóst var á þeim tíma að ekkert þeirra fyrirtækja sem starfa í þeim geira ætlaði sér að ráðast í slíka fjárfestingu í Vestmannaeyjum. Þegar Míla hf. óskaði í sumar eftir viðræðum um kaup á því kerfi sem Eygló var þá þegar komin langt með að byggja upp voru viðbrögð Vestmannaeyjabæjar og stjórnar Eyglóar jákvæð, enda Míla í farabroddi fyrirtækja á þessu sviði og leiðandi í tækniþróun. Kerfi Mílu verður að sjálfsögðu opið öllum þjónustuaðilum á Íslandi.

Uppbygging og rekstur á kerfi sem þessu er kostnaðarsamur og vandasamur og ekki hluti af lögbundnu hlutverki sveitarfélaga. Það var aldrei sjálfstætt markmið Vestmannaeyjabæjar að standa fyrir slíku heldur var þetta í raun gert af illri nauðsyn því markaðsaðilar voru þá ekki reiðubúnir í þá fjárfestingu sem þurfti til að tryggja Eyjamönnum þessa þjónustu.

Við afgreiðslu málsins á fundi bæjarráðs í gær voru allir bæjarfulltrúar viðstaddir og niðurstaða málsins samþykkt samhljóða.

Innan skamms munu öll heimili í Vestmannaeyjum hafa aðgang að háhraða nettengingum og verður þá markmiðinu með stofnun Eyglóar náð.

Njáll Ragnarsson er formaður stjórnar Eyglóar ehf.:

„Ég og við í stjórn félagsins erum mjög ánægð með að samningar hafi tekist og að Míla fari af krafti í það að halda verkefninu áfram. Samtal okkar við forsvarsmenn Mílu hefur verið gott og þar á bæ eru menn stórhuga um að koma á enn betri nettengingu inn á heimili í Vestmannaeyjum.

Auk þess hefur þessi samningur þá þýðingu að sveitarfélagið getur nú einbeitt sér að sínum verkefnum í stað þess að standa í kostnaðarsömum fjárfestingum og rekstri ljósleiðarakerfis“.