Kjarnaborun í rannsóknarholu Eyjaganga á Eiðinu í Vestmannaeyjum er nú lokið og undirbúningur fyrir næsta áfanga verkefnisins hafinn. Þetta kemur fram í nýrri frétt á vef Eyjaganga.

Samkvæmt upplýsingum frá Eyjagöngum hefur rannsóknarholan EG-01 skilað mikilvægu efni og gögnum um jarðlög á svæðinu sem nýtast munu við áframhaldandi undirbúning og hönnun mögulegra ganga milli lands og Eyja.

Næst verður hafist handa við rannsóknarholu EG-02 á Landeyjasandi. Kjarnaborinn Karl Prins hefur þegar verið fluttur frá Vestmannaeyjum og verður honum komið fyrir á nýjum borstað við ströndina á Landeyjasandi þar sem rannsóknir halda áfram.

Í frétt Eyjaganga kemur fram að Benedikt Óskar Steingrímsson hjá Völubergi hafi sent inn mynd sem sýnir staðsetningu næstu borholu, sem verður staðsett skammt frá strandlengjunni á Landeyjasandi.

Rannsóknarboranirnar eru hluti af undirbúningsvinnu vegna mögulegra Eyjaganga og er gert ráð fyrir að niðurstöður þeirra veiti mikilvægar upplýsingar um jarðfræðilegar aðstæður á fyrirhugaðri leið.