Framleiðslu nýju almannavarnavatnsleiðslunnar NSL-4 er lokið og undirbúningur hafinn að flutningi hennar til Vestmannaeyja. Frá þessu greina bæjaryfirvöld á vefsíðu Vestmannaeyjabæjar.

Þar segir að framleiðandinn, NOV hafi afhent leiðsluna og tók fyrirtækið Subsea 7, sem annast flutning og útlagningu hennar, við endastykki leiðslunnar á mánudag.

Vel hefur gengið að spóla leiðslunni inn á tromlu og er gert ráð fyrir að þeirri vinnu ljúki á fimmtudag. Að því loknu tekur við fjögurra til fimm daga sigling til Vestmannaeyja. Þegar skipið kemur til Eyja hefst lokaáfangi verkefnisins, en þá verður almannavarnavatnsleiðslan lögð milli lands og Eyja.

Um er að ræða mikilvægan áfanga í verkefninu, sem ætlað er að auka afhendingaröryggi neysluvatns til Vestmannaeyja. Nýja leiðslan verður lögð til hliðar við núverandi leiðslu, NSL-3, sem skemmdist í nóvember 2023.