Ein af notalegri stundum Goslokahátíðar í ár átti sér stað í Svölukoti. Þar tóku Ólafur R. Sigurðsson á Stapa og afkomendur hans á móti gestum og leiddu þá um fjölskyldusýningu sem sett var upp í tilefni hátíðarinnar.

Í myndbandinu rifjar Óli upp sögu Vatnsdals af sinni alkunnu frásagnargáfu, segir frá fólkinu, staðnum og listaverkunum sem prýða sýninguna. Þar eru eingöngu verk eftir fjölskyldumeðlimi frá Stapa; olíumálverk eftir Ólaf, vatnslitamyndir eftir Guðjón Ólafsson, akrílverk eftir Hafdísi Ösp Garðarsdóttur og olíumálverk og stafræna myndlist eftir Svanhvíti Birnu Samúelsdóttur.

Myndbandið fangar ekki aðeins söguna og listina heldur einnig hlýlegt augnablik þegar Guðjón sonur Óla gengur með föður sínum um sýninguna og spjallar við hann. Sú stund gefur myndbandinu sérstakan blæ og minnir á að sagan, listin og tengslin við Vatnsdal lifa áfram á milli kynslóða.

25 mínútna ferðalag um sögu, list og minningar frá Vatnsdal – vel þess virði að gefa sér tíma til að njóta.