Petar Jokanovic, markvörður ÍBV í handbolta, hefur skrifað undir nýjan samning við félagið og gildir samningurinn til ársins 2028. ÍBV greindi frá á samfélagsmiðlum sínum fyrr í dag.

Petar er 35 ára og kemur frá Bosníu. Hann kom fyrst til ÍBV árið 2019 og hefur leikið með liðinu síðan. Í tilkynningu ÍBV segir, ,,Petar hefur verið gríðarlega mikilvægur fyrir liðið með sinni miklu reynslu, öryggi og leiðtogahæfileikum fyrir okkar yngri markmenn. Hann hefur verið einn af lykilmönnum liðsins og stór þáttur í þeim árangri sem náðst hefur”.

,,Samhliða því hefur Petar verið að þjálfa yngri flokka félagsins þar sem hann hefur staðið sig virkilega vel. Það er afar mikilvægt fyrir félagið að hafa reynslumikinn einstakling eins og Petar í starfi með yngri iðkendum og við erum mjög ánægð að hann muni koma til að halda áfram því mikilvæga hlutverki hjá félaginu”.

Að lokum segir ,,Það er því mikið gleðiefni að Petar verði áfram í hvítu og svörtu næstu árin”.