Erlingur Richardsson hefur verið ráðinn yfirþjálfari hjá akademíu austurríska handknattleiksfélagsins Handball Mödling, skammt frá Vínarborg.
Félagið var sett á laggirnar 2018 af austurrísku handknattleiksmönnunum Stefan Higatzberger og Conny Wilczynski. Hefur það frá upphafi einbeitt sér að þjálfun barna og unglinga með framtíðina í huga. Greint er frá þessu á handboltavefnum Handbolti.is.
Tilkynnt var um ráðningu Erlings til félagsins í morgun. „Ég mun leggja línurnar og félagið er að kaupa mína hugmyndafræði sem ég kynni fyrir þjálfurum og leikmönnum,“ sagði Erlingur við handbolta.is. Erlingur er afar spenntur fyrir þessu nýja verkefni sem lýtur fyrstu og fremst að uppbyggingu ungmennstarfs og þjálfun. Lítt plægður akur er fyrir handbolta í Austurríki.
Erlingur mun áfram búa í Vestmannaeyjum en sækir Mödling heim með reglubundnum hætti í sex til sjö lotum yfir æfinga- og keppnistímabilið og verður þá úti í 70 til 80 daga alls, segir í frétt handbolta.is. Nánar má lesa um málið hér.
