Borun rannsóknarholunnar EG-02 á Landeyjasandi hefur nú náð 180,5 metra dýpi. Borunin er liður í gagnaöflun Eyjaganga ehf. vegna kortlagningar jarðlaga meginlandsmegin. Frá þessu er greint á vefsíðu Eyjaganga.

Þar segir jafnframt að Ræktunarsamband Flóa og Skeiða annist borunina en verkfræðistofan EFLA og jarðfræðistofan Völuberg sjá um eftirlit, faglega umsjón og rannsóknarráðgjöf.

Í upphafi var holan fóðruð niður á 41 metra dýpi til að styðja við laus yfirborðslög. Síðan hefur verið borað í fastan berggrunn.

Sýni úr holunni verða send til greiningar þar sem meðal annars verður lagt mat á bergstyrk, sprunguþéttleika og lekaeiginleika. Niðurstöðurnar verða nýttar ásamt gögnum úr rannsóknarholunni EG-01 í Vestmannaeyjum og endurvarpsmælingum í Eyjasundi við gerð heildstæðs jarðfræðilíkans af svæðinu.

Stefnt er að því að bora holuna niður á um 300 metra dýpi. Áætlað er að fýsileikamat vegna mögulegra jarðganga milli lands og Eyja liggi fyrir í lok árs, segir í fréttinni.