Staða samgangna til Vestmannaeyja verður til umræðu á opnum fundi umhverfis- og samgöngunefndar Alþingis í dag, mánudaginn 18. maí. Gestur fundarins verður Eyjólfur Ármannsson en fundurinn hefst klukkan 15:00 og verður í beinu streymi á vef Alþingis. Fundurinn er jafnframt opinn almenningi og fulltrúum fjölmiðla á meðan húsrúm leyfir.

Það var Halla Hrund Logadóttir, þingmaður Framsóknar í Suðurkjördæmi sem óskaði eftir fundinum á fundi nefndarinnar fyrr í vor. Beiðnin var samþykkt einróma og ákveðið að kalla ráðherra á opinn fund til að fara yfir stöðuna.

Samgöngur raskast verulega

Tilefni fundarins eru þær áskoranir sem verið hafa í samgöngum til og frá Vestmannaeyjum síðustu mánuði, meðal annars vegna stöðu Landeyjahafnar og þeirra erfiðleika sem fylgt hafa rekstri Herjólfs sökum bilana og ófærðar um fyrrgreinda höfn. Í tengslum við fundarbeiðnina hefur meðal annars verið kallað eftir umræðu um langtímaúrræði, varaskipakost og hvort móta eigi heildstæða ferjuáætlun fyrir landið allt.

Fundurinn fer fram í Smiðju við Tjarnargötu í Reykjavík og verður sýndur í beinni útsendingu á vef Alþingis og sjónvarpsrás Alþingis.