Fjölskyldu- og tómstundaráð Vestmannaeyjabæjar mótmælir harðlega þeirri stöðu að stór hluti barna sem lokið hafa 7. bekk geti ekki tekið þátt í vinnuskóla bæjarins vegna gildandi laga um vinnu barna.

Þetta kemur fram í bókun ráðsins, sem var tekin fyrir í framhaldi af svari frá félags- og húsnæðismálaráðuneytinu. Þar kemur skýrt fram að ekki sé heimilt að ráða til vinnu börn sem ekki hafa náð 13 ára aldri. Vísað er til ákvæða laga um aðbúnað, hollustuhætti og öryggi á vinnustöðum og reglugerða sem byggja á þeim.

Ráðið segir óásættanlegt að börn í sama árgangi njóti ekki sömu tækifæra og að réttur þeirra til þátttöku í vinnuskóla ráðist af fæðingardegi. Að mati ráðsins feli það í sér mismunun og gangi gegn markmiðum vinnuskólans um að veita ungmennum fyrstu kynni af atvinnulífi og samfélagsþátttöku.

Samkvæmt bókuninni sóttu 56 börn um þátttöku í vinnuskólanum í sumar. Af þeim geta 34 ekki hafið störf þegar vinnuskólinn byrjar þar sem þau hafa ekki náð 13 ára aldri.

Ráðið samþykkti að þau börn sem verða 13 ára á meðan vinnuskólinn stendur yfir geti hafið störf um leið og þau ná þeim aldri. Þrátt fyrir það verða 25 börn eftir sem ná ekki 13 ára aldri á starfstíma vinnuskólans og fá því ekki vinnu í sumar. Segir ráðið það afar miður.

Í bókuninni er jafnframt skorað á stjórnvöld og Alþingi að breyta lögum nr. 46/1980 um aðbúnað, hollustuhætti og öryggi á vinnustöðum þannig að öllum börnum sem lokið hafa 7. bekk verði tryggður jafn réttur til þátttöku í vinnuskóla, óháð fæðingardegi.

Einnig er óskað eftir því að bæjarstjóri fylgi málinu eftir gagnvart stjórnvöldum og umboðsmanni barna. Ráðið segir að lokum óverjandi að börn í sama árgangi sitji ekki við sama borð þegar komi að þátttöku í vinnuskóla sveitarfélagsins.