Séra Kristján Björnsson, vígslubiskup í Skálholti, hefur sagt embætti sínu lausu. Það gerir hann í kjölfar setningar nýrra starfsreglna um vígslubiskupa sem samþykktar voru á nýliðnu kirkjuþingi. Þetta kemur fram í Morgunblaðinu í dag.

Kristján er fyrrverandi Eyjaprestur. Hann var kjörinn prestur í Vestmannaeyjum 12. júlí 1998 og tók við embætti vígslubiskups árið 2018.

„Ég get staðfest að ég hef beðist lausnar frá embætti vígslubiskups í Skálholti og hefur biskup Íslands fallist á það,“ segir Kristján í samtali við Morgunblaðið.

„Fyrst þessar nýju reglur eru komnar fram finnst mér eðlilegt að kirkjan fái að innleiða þær. Þetta er veruleg breyting sem samþykkt hefur verið á kirkjuþingi og ég ætla ekki að standa gegn nýjum tíma,“ segir Kristján.

Nánar er fjallað um málið í Morgunblaðinu í dag.