- Eyjafréttir
- ·
- Stjórnmál
- ·
Ritstjórn
Samfylkingin styrkir stöðu sína sem stærsti flokkur landsins samkvæmt nýjum Þjóðarpúlsi Gallup fyrir RÚV. Flokkurinn mælist með 30,8% fylgi en Sjálfstæðisflokkurinn fylgir á eftir með 24,7%.
Helsta breytingin frá ágústmælingunni er sú að fylgi Sjálfstæðisflokksins minnkar um 2,1 prósentustig. Samfylkingin bætir hins vegar við sig 1,2 prósentustigum og Viðreisn 0,9 stigum.
Miðflokkurinn mælist með 15,0% fylgi, Viðreisn með 10,6%, Framsóknarflokkurinn 5,9%, Flokkur fólksins 4,0% og Vinstri græn 3,7%. Píratar mælast með 2,7% fylgi og Sósíalistaflokkur Íslands með 2,4%.
Fylgi flokkanna á landsvísu
| Flokkur | September | Ágúst | Breyting |
|---|---|---|---|
| Samfylkingin | 30,8% | 29,6% | +1,2 |
| Sjálfstæðisflokkurinn | 24,7% | 26,8% | -2,1 |
| Miðflokkurinn | 15,0% | 15,6% | -0,6 |
| Viðreisn | 10,6% | 9,7% | +0,9 |
| Framsóknarflokkurinn | 5,9% | 5,5% | +0,4 |
| Flokkur fólksins | 4,0% | 4,8% | -0,8 |
| Vinstri græn | 3,7% | 3,6% | +0,1 |
| Píratar | 2,7% | 1,9% | +0,8 |
| Sósíalistaflokkur Íslands | 2,4% | 2,4% | 0,0 |
Samanlagt fylgi stjórnarflokkanna, Samfylkingarinnar, Viðreisnar og Flokks fólksins, mælist 45%. Tæplega 49% þeirra sem taka afstöðu segjast styðja ríkisstjórnina.
Samkvæmt útreikningi Gallup fengi Samfylkingin 23 þingmenn ef niðurstöður mælingarinnar yrðu úrslit kosninga. Sjálfstæðisflokkurinn fengi 18 þingmenn, Miðflokkurinn ellefu, Viðreisn sjö og Framsóknarflokkurinn fjóra. Aðrir flokkar næðu ekki manni á þing.
Miðflokkurinn sækir verulega á í Suðurkjördæmi
Sjálfstæðisflokkurinn mælist áfram stærsti flokkurinn í Suðurkjördæmi með 31,2% fylgi. Miðflokkurinn sækir hins vegar verulega í sig veðrið og mælist næststærstur með 24,7%.
Fylgi Miðflokksins eykst um tæp sjö prósentustig frá ágústmælingunni, þegar það mældist 17,8%.
Samfylkingin gefur að sama skapi mikið eftir í kjördæminu. Fylgi flokksins mælist nú 17,9%, samanborið við 25,5% í ágúst. Það er samdráttur um 7,6 prósentustig milli mánaða.
Framsóknarflokkurinn mælist með 8,2% fylgi, Flokkur fólksins 7,0% og Viðreisn 5,5%. Vinstri græn mælast með 2,8%, Sósíalistaflokkur Íslands 1,2% og Píratar 1,0%.
Fylgið í Suðurkjördæmi
| Flokkur | September | Ágúst | Breyting |
|---|---|---|---|
| Sjálfstæðisflokkurinn | 31,2% | 33,1% | -1,9 |
| Miðflokkurinn | 24,7% | 17,8% | +6,9 |
| Samfylkingin | 17,9% | 25,5% | -7,6 |
| Framsóknarflokkurinn | 8,2% | 8,0% | +0,2 |
| Flokkur fólksins | 7,0% | 5,4% | +1,6 |
| Viðreisn | 5,5% | 4,8% | +0,7 |
| Vinstri græn | 2,8% | 2,9% | -0,1 |
| Sósíalistaflokkur Íslands | 1,2% | 0,7% | +0,5 |
| Píratar | 1,0% | 1,5% | -0,5 |
Miðað við kjördæmaúthlutun Gallup fengi Sjálfstæðisflokkurinn þrjá af níu kjördæmakjörnum þingmönnum Suðurkjördæmis og Miðflokkurinn sömuleiðis þrjá. Samfylkingin fengi tvo og Framsóknarflokkurinn einn.
Í ágústmælingunni fékk Sjálfstæðisflokkurinn fjóra kjördæmakjörna þingmenn í Suðurkjördæmi, Samfylkingin þrjá og Miðflokkurinn tvo.
Kjördæmaskiptingin byggist á færri svörum en landsmælingin og ber því að túlka breytingar milli mánaða með fyrirvara.
Könnun Gallup fyrir RÚV var gerð dagana 1. til 28. september. Heildarúrtakið var 10.485 manns og þátttökuhlutfallið 38,6%. Vikmörk á fylgi flokkanna á landsvísu eru á bilinu 0,5 til 1,6 prósentustig.
