Snælduvitlaust veður í Vestmannaeyjum
Það gustar um Vestmannaeyjar þessa stundina en á að lægja í hádeginu.

Ritstjórn

frettir@eyjafrettir.is

Í Vestmannaeyjum er snælduvitlaust veður, stórviðri af austri með snjókomu. Klukkan 10.00 mældist vindhraðinn 38 metrar á sekúndu og hitinn var 1 stig. Mesti 10 mínútna meðalvindur var 41 m/s og mesta hviða 48 m/s. Veðrið gengur hratt yfir og verða sunnan 5 metrar, 4 stiga hiti og rigning klukkan 12.00.

„Viljum við góðfúslega benda ykkur á að appelsínugul veðurviðvörun er í gildi í fyrramálið frá klukkan 07.00. Því þarf að huga að lausamunum, en auk mikils vinds er búist við slyddu eða rigningu í fyrramálið. Hitastigið þarf ekki að lækka mikið frá spánni til þess að snjókoma myndist í staðinn,“ segir í tilkynningu frá Lögreglunni í Vestmannaeyjum í gær.

Grunnskóli Vestmannaeyja sendi frá sér tilkynningu til foreldra í gær þar sem bent var á að appelsínugul veðurviðvörun tæki gildi frá klukkan 07.00 í morgun.

„Ef um appelsínugular viðvaranir er að ræða eru stofnanir alla jafna opnar og skólastarf óskert. Foreldrar og forráðamenn meta hvort börn þeirra mæti í skólann og ber þeim að tilkynna forföll til ritara eða umsjónarkennara strax að morgni. Bæjaryfirvöld ákveða, að höfðu samráði við lögreglu, hvort grípa þurfi til lokana,“ segir í tilkynningunni, og voru foreldrar beðnir um að fylgja að minnsta kosti yngstu nemendum inn í skólann í morgun.

Framhaldsskólinn sendi frá sér viðvörun í morgun. „Veðrið er mjög slæmt og einhverjir hafa þurft aðstoð við að komast inn af bílastæði skólans. Allt hefur samt farið vel. Veðrið er að versna og í ljósi þess ætlum við að fella niður næsta tíma og taka stöðuna klukkan 10.00.

Við mælum gegn því að koma upp í skóla fyrr en veðrið hefur gengið niður og búið er að taka ákvörðun um framhaldið. Það fer vel um okkur sem erum mætt og við erum ekki að fara neitt fyrr en veðrið gengur niður,“ segir í tilkynningunni sem var ítrekuð fyrir skömmu.

„Veðrið er ekkert að lagast hérna fyrir utan og því fellur niður kennsla það sem eftir er dags. Við ætluðum hvort sem er alltaf að hafa stuttan kennsludag í dag vegna árshátíðarinnar í kvöld, sem verður eins og áætlað var.

Kennararnir verða í sambandi við ykkur í gegnum Innu og þið fylgist með hvað þið eigið að gera í staðinn fyrir að mæta í tíma.“

Herjólfur sigldi til Þorlákshafnar klukkan 9.00 og þeysist einar 17 mílur á lensinu.

Nýjustu fréttir

Íþróttir
Eyjamenn sóttu þrjú mikilvæg stig norður
Áhugavert
„Við erum ótrúlega stolt af ykkur“
Myndband
Mikill ferðamannastraumur um helgina – myndband
Úr blaði Eyjafrétta
Heimir og Særún heilluðust af Vestmannaeyjum
Íþróttir
Glæsilegu TM móti lokið – Þróttur R. varð TM móts meistari
Íþróttir
ÍBV getur farið upp fyrir Þór
Áhugavert
Sýndu fjölbreytni, metnað og sköpunargleði
Íþróttir
ÍBV stelpurnar gerðu jafntefli við Þrótt R.
Mest lesið

Góð ráð fyrir siglingu

Sjóveiki

Hvað er sjóveiki?

Sjóveiki er misræmi milli skynfæra líkamans sem senda boð til heilans um hreyfingu – kyrrstöðu.

Þegar einstaklingur er úti á sjó þá nema skynjarar í vökvafylltum gangi í innra eyra hreyfingu og senda boð til heilans að einstaklingur sé á hreyfingu. Augun senda hins vegar boð til heilans um að viðkomandi sé kyrr. Heilinn á erfitt með að vinna úr þessum misvísandi og ósamræmdu upplýsingum og sendir skilaboð til magans um að tæma sig – þ.e. veldur uppköstum.

Einkenni sjóveiki eru þreyta, ógleði, svimi, svitakóf og uppköst.

Góð ráð til að hindra sjóveiki:

  • Góð hvíld daginn fyrir brottför. Að fara seint að sofa og snemma um borð í bát fer ekki vel saman ef fólk er hætt við sjóveiki.
  • Forðist áfenga drykki daginn fyrir brottför
  • Forðist djúpsteiktan, brasaðan eða saltan mat daginn fyrir siglingu.
  • Borðið góðan morgunverð. Borðið gjarnan hvítt brauð, hafragraut og ávexti þó ekki sítrus ávexti.
  • Forðist mikið koffein. Mikið kaffi er ekki það sem maganum líkar fyrir sjóferð.
  • Hafðu mat með þér á sjó. Gott er að hafa samlokur með kjúklingi eða kalkún. Kjötið er fitusnautt og brauðið er róandi í maga. Hafðu endilega eitthvað til að grípa í sem er létt í maga. Bananar eru mjög góðir til að narta í ef þú finnur fyrir ógleði en einnig er gott að hafa létt kex eða annað sem er ekki salt eða fitumikið.
  • Drekkið vel af vatni en einnig er gott er að drekka kóla drykki eða engiferöl í sjóferðinni

Lyf við sjóveiki þ.e. lyf sem slá á einkennin og fást án lyfseðils í apóteki.

  • Koffínátín – fæst án lyfseðils
  • Postafen – fæst án lyfseðils
  • Scopolamin plástur – lyfseðilsskyltEinnig má fá armbönd gegn ferðaveiki sem sumir telja að hjálpi.

Önnur ráð:

  • Engifer er jurt sem nýlega hefur fengið aukna athygli vegna þess að því er haldið fram að hún geti slegið á ógleði sem fylgir sjóveiki. Til forna tuggðu kínverskir sjómenn engiferrót til að draga úr sjóveiki. Flest lyf sem virka á ógleði verka á heilann en engifer virkar aðeins á magann. Ráðlagt er að taka 1000 mg. hylki hálftíma fyrir brottför. Einnig má taka eitt eða tvö 500 mg. hylki sem eru til viðbótar á ferðalaginu. Ekki er ráðlagt að drekka coke með engifertöflum.
  • Piparminta og te eru einnig gömul húsráð við ferðaveiki.
  • Sumum finnst betra að taka sýrujafnandi töflur, Alminox eða slíkt áður en þú heldur á sjó og þá er gott að hafa box með út á sjó.

Hvar í skipinu er best að vera o.fl.

  • Minna finnst fyrir hreyfingu og veltingi ef maður er staddur næst miðju bátsins.
  • Mörgum finnst gott að vera í kulda, t.d.að vera úti á dekki og láta vindinn leika um sig.
  • Matarlykt fer illa í þá sem hætt er við sjóveiki og einnig pústið frá bátnum.

Þungun:

Þungaðar konur sem þjást af sjóveiki mega nota koffinátín í litlum skömmtum en best er að ráðfæra sig við lækni eða lyfjafræðing.
Þunguðum konum er ekki ráðlagt að nota engifer þar sem það er ekki staðfest hvort það geti haft skaðleg áhrif á fóstur.

Eyjafréttir
Keyrt af  GDPR Cookie Compliance
Friðhelgisyfirlýsing

Þessi vefsíða notar fótspor til að við getum veitt þér bestu notendaupplifun. Upplýsingar um fótspor eru geymdar í vafranum þínum og framkvæma aðgerðir eins og að þekkja þig þegar þú kemur aftur á vefsíðu okkar og hjálpa teymi okkar að skilja hvaða hluta vefsíðunnar þér finnst áhugaverðast og gagnlegast.