Vinna við útlagningu nýju almannavarnarlagnarinnar milli lands og Eyja hefur tafist. Útlagningaraðili vinnur nú að því að yfirfara stöðuna og meta næstu skref. Þetta kemur fram í tilkynningu Vestmannaeyjabæjar sem birt var í dag.

Útlagningarskipið Seven Navica hefur verið á svipuðum slóðum undanfarna sólarhringa, þótt það hafi farið ágætan spöl í gærkvöldi.

Samkvæmt upplýsingum sem Vestmannaeyjabær hefur fengið hafa tæknilegir örðugleikar tafið framkvæmdina. Útlagningaraðilinn vinnur nú að því að yfirfara og meta stöðuna, en frekari upplýsingar liggja ekki fyrir að svo stöddu.

Útlagning NSL-4 hófst aðfaranótt miðvikudags. Í fyrri tilkynningu bæjarins kom fram að áætlað væri að útlagningu lagnarinnar lyki um helgina. Óskar Pétur Friðriksson, ljósmyndari Eyjafrétta tók meðfylgjandi myndir í dag.