- Eyjafréttir
- ·
- Vinnslustöðin
- ·
Ritstjórn
Eftir hálfa öld hjá Vinnslustöðinni hefur Sigurður Sveinsson látið af störfum. Í viðtali á heimasíðu fyrirtækisins rifjar hann upp breytingar í gegnum árin og lýsir starfsferlinum í einni setningu: „Þetta hefur verið dans á rósum.“
Það eru ekki margir sem geta litið yfir öxlina og sagt frá hálfrar aldar starfsferli hjá sama fyrirtæki. Sigurður Sveinsson er einn þeirra en hann er nú að láta af störfum hjá Vinnslustöðinni eftir 50 ára starf. Á þessum tíma hefur hann kynnst fyrirtækinu frá ýmsum hliðum og séð miklar breytingar verða á vinnuumhverfi og starfsháttum.
Byrjaði á tækjunum
Sigurður segir að fyrstu skrefin hjá Vinnslustöðinni hafi verið tekin á tækjunum þar sem Ási Galdró var verkstjóri. „Ég var á tækjunum. Ási Galdró var verkstjóri þar,“ segir Sigurður þegar hann rifjar upp fyrstu árin, þó hann segist ekki muna fyrsta vinnudaginn sérstaklega vel eftir svo langan tíma.
Starfsferillinn varð fjölbreyttur. Hann starfaði í um tíu ár í frystihúsinu, tók síðan tíu ár þar sem loðnuvertíðir og vinna í stöðinni skiptust á og síðar lá leiðin yfir í bræðsluna.
Miklar breytingar á vinnuumhverfinu
Þegar Sigurður er spurður út í stærstu breytingarnar á þessum áratugum nefnir hann meðal annars aðbúnaðinn og tæknina. „Vinnutíminn og aðbúnaðurinn hefur breyst mikið og allt orðið sjálfvirkara,“ segir hann.
Á einum tímapunkti lá leiðin einnig annað. Sigurður hætti árið 2007 og starfaði í þrjú ár annars staðar, meðal annars hjá Húsasmiðjunni og Godthaab, áður en hann sneri aftur. „Í byrjun árs 2011 kom ég svo aftur í bræðsluna,“ segir hann.
Þakklæti fyrir farsælt samstarf
Þótt ótal minningar hafi safnast í sarpinn á fimm áratugum segist Sigurður þurfa aðeins meiri tíma til að rifja upp einhverjar sérstakar sögur. Þegar hann er hins vegar beðinn um að lýsa þessum 50 árum í einni setningu stendur svarið ekki á sér: „Þetta hefur verið dans á rósum.“
Í lok umfjöllunarinnar er Sigga þakkað kærlega fyrir 50 ára tryggð, góð störf og samstarf í gegnum tíðina. „Við óskum honum innilega til hamingju með þennan merka áfanga og alls hins besta á komandi árum,” segir í fréttinni á vef Vinnslustöðvarinnar.
