Fyrr í mánuðinum voru opnuð tilboð í jarðvinnu og lagnir við endunýjun Hásteinsvallar. Fram kemur í fundargerð framkvæmda- og hafnarráðs Vestmannaeyja að tvö tilboð hafi borist í verkið, en bjóða þurfti verkið út aftur vegna þess að eina tilboðið sem barst áður þótti of hátt.

Tilboðin sem nú bárust voru annars vegar frá Þjótanda ehf. og hlóðaði það upp á 116.030.706 kr og hins vegar frá Fagurverk ehf. upp á 129.718.800 kr. Ekki kemur fram í fundargerðinni upp á hvað kostnaðaráætlun bæjarins hljóðaði.

Verklok á velli 1. maí 2025

Sigurður Smári Benonýsson byggingarfulltrúi kynnti á fundinum niðurstöður tilboða og fór yfir tímalínu framkvæmdarinnar og minnisblað umhverfis- og framkvæmdasviðs vegna hitalagna undir völlinn.

Tímalína framkvæmda er eftirfarandi:

Jarðvinna og lagnir fyrir vökvun 2. janúar til 1. maí.
Lagning gervigras frá 1. apríl til 1. maí er háð veðri og afhendingu. Tekur um 4 vikur að leggja gervigrasið.
Undirstöður fyrir flóðlýsingu 1. mars til 1. maí.
Jarðvinna og uppsetning á tæknirými frá 2. janúar til 1. maí.
Verklok á velli 1. maí 2025, Hásteinsvöllur tilbúinn til notkunar.
Uppsetning á flóðlýsingu og frágangur janúar til maí 2026.
Uppsteypa á tæknirými verður boðin út í desember 2025.
Gervigrasmotta og útlagning verður boðin út í byrjun janúar.

Þá segir að heildarkostnaður framkvæmdarinnar sé 280 m.kr. á verðlagi þessa árs.

Rekstrarkostnaður hitalagna 30-60 milljónir á ári

Einnig var farið yfir minnisblað sem unnið var vegna hitalagna undir Hásteinsvöll og er áætlaður kostnaður við hitalagnir og tengingu við kerfi HS veitna 85 milljónir, sjá sundurliðun í meðfylgjandi minnisblaði. Rekstrarkostnaður við að keyra kerfið í 4 mánuði er um 60 m.kr. á ári skv. minnisblaði HS.

Framkvæmdakostnaður við hitalagnir og tengingu við varmadælu er áætlaður 265 milljónir. Rekstrarkostnaður við að keyra kerfið í 4 mánuði er um 30 m.kr. á ári. Bæjarstjórn tók ákvörun við samþykkt fjárhagsáætlunar að leggja ekki hitalagnir undir Hásteinsvöll vegna kostnaðar við rekstur þeirra. Bæjarráð staðfesti þá ákvörðun á fundi þann 11. desember sl..

Erlingur Guðbjörnsson, formaður ráðsins lagði til að framkvæmdanefnd yrði stofnuð til að fylgja eftir framkvæmdinni og í nefndinni verði Erlingur Guðbjörnsson formaður, Sæunn Magnúsdóttir varaformaður og Brynjar Ólafsson framkvæmdastjóri umhverfis- og framkvæmdasviðs.

Í niðurstöðu segir að ráðið samþykki að ganga til samninga við Þjótanda ehf. á grundvelli tilboðs og felur framkvæmdastjóra umhverfis- og framkvæmdasviðs framgang málsins. Ráðið samþykkti einng að skipa framkvæmdanefnd fyrir hönd ráðsins. Nefndin mun kalla til sín þá aðila sem að framkvæmdinni koma eftir þörfum.