Tryggvið Guðmundsson, leikmaður knattspyrnuliðs ÍBV er orðinn næst markahæsti leikmaður ÍBV í efstu deild frá upphafi. Tryggvi skoraði eina mark Eyjamanna í gær gegn FH og komst um leið upp fyrir Sigurlás Þorleifsson. Lási, eins og hann er jafnan kallaður, skoraði á sínum tíma 60 mörk fyrir ÍBV í efstu deild en Tryggvi hefur nú skorað 61 mark. Markahæstur sem fyrr er fyrrum félagi Tryggva í framlínu ÍBV, Steingrímur Jóhannesson en hann skoraði 72 mörk fyrir ÍBV.