Það verður sannkölluð íþróttaveisla í Vestmannaeyjum í dag þegar kvennalið ÍBV í handbolta og knattspyrnu leika heimaleiki með skömmu millibili.

Fyrri leikur dagsins hefst klukkan 13.00 í Íþróttamiðstöðinni þegar ÍBV tekur á móti KA/Þór í fyrstu umferð Olísdeildar kvenna í handbolta. Miklar væntingar eru gerðar til Eyjaliðsins í vetur, en þjálfarar og fyrirliðar liðanna spáðu ÍBV deildarmeistaratitlinum í árlegri spá sinni fyrir tímabilið.

Að handboltaleiknum loknum færist fjörið yfir á Hásteinsvöll. Þar taka knattspyrnukonur ÍBV á móti Fram klukkan 15.30 í lokaumferð fyrri hluta Bestu deildarinnar.

ÍBV er í þriðja sæti deildarinnar með 27 stig og hefur þegar tryggt sér sæti í efri hlutanum. Fram er í áttunda sæti með 19 stig. Eyjakonur koma inn í leikinn eftir góðan 2:1-útisigur á toppliði Breiðabliks í síðustu umferð, en Fram vann Stjörnuna 3:2.

Það er því tilvalið fyrir stuðningsmenn ÍBV að hefja daginn í Íþróttamiðstöðinni og halda þaðan beint á Hásteinsvöll.

• Klukkan 13.00: ÍBV – KA/Þór í Olísdeild kvenna í handbolta.
• Klukkan 15.30: ÍBV – Fram í Bestu deild kvenna í knattspyrnu.