Bæjarráð Vestmannaeyja hefur samþykkt að óska eftir framlengingu á samningi sveitarfélagsins og ríkisins um rekstur Herjólfs. Núgildandi samningur rennur út 31. desember 2026, en heimilt er að framlengja hann um tvö ár, til ársloka 2028.

Sveitarfélagið þarf að senda tilkynningu til ríkisins í janúar 2026, óski það eftir að nýta sér framlengingarákvæði samningsins. Bæjarráð samþykkti samhljóða að fela bæjarstjóra að senda slíka beiðni fyrir hönd sveitarfélagsins og vísaði málinu áfram til staðfestingar í bæjarstjórn, þar sem það var samþykkt með níu samhljóða atkvæðum.

Vestmannaeyjaferjan Herjólfur ohf., sem er að fullu í eigu Vestmannaeyjabæjar tók við rekstri ferjunnar í apríl 2019, en núverandi ferja var tekin til notkunar sumarið sama ár.