Lögreglan hafði í nógu að snúast í vikunni sem leið og fór töluverður tími lögreglunnar í rannsókn og eftirlit vegna bruna að Hilmisgötu 1 þann 24. október sl. Þegar hefur verið gerð grein fyrir brunanum í fjölmiðlum.

Tvö eignapjöll voru tilkynnt lögreglunni í vikunnis sem leið en í báðum tilvikum var um að ræða rúðubrot.  Að morgni 26. október sl. var lögreglu tilkynnt um rúðubrot í Ráðhúsinu en talið er að rúðan hafi verið brotin aðfaranótt sama dags. Ekki er vitað hver þarna var að verki og óskar lögreglan eftir því að þeir sem eitthvað viti um málið hafi samband við lögreglu. 

Aðfaranótt 27. október sl. var lögreglu tilkynnt um að tvær rúður hafi verið brotnar að Höfðavegi 3 og telur lögreglan sig hafa upplýsingar um hver þarna var að verki.

Aðfaranótt 28. október sl. stöðvaði lögregla samkvæmi sem haldið var í kró v/Græðisbraut en þarna hafði nemendafélag Framhaldsskóla Vestmannaeyja staðið fyrir skemmtun.  Þar sem ekkert leyfi var fyrir skemmtuninni var hún stöðvuð.

Einn ökumaður var söðvaður fyrir of hraðann akstur í vikunni en hann mældist á 80 km/klst á Strandvegi en þar er hámarkshraði 50 km/klst.

Um miðjan dag þann 25. október sl. var lögreglu tilkynnt um árekstur á gatnamótum Strandvegar og Hlíðarvegar en þarna hafði bifreið sem ekið var vestur Strandveg lent aftan á bifreið sem var kyrrstæð á gatnamótunum. Engin slys urðu á fólki en töluverðar skemmdir urðu á annarri bifreiðinn.  Tvö önnur umferðaróhöpp voru tilkynnt lögreglu í vikunni en þau voru bæði minniháttar og engin slys á fólki.