Tvö kör af olíublautum pysjum í morgun

Sea Life Trust barst heldur óskemmtileg sending nú í morgun þegar starfsfólk Vinnslustöðvarinnar kom með 47 olíublautar lundapysjur. Eins og Eyjafréttir hafa áður greint frá hefur töluvert borist af olíublautum fuglum uppá síðkastið.

Öll aðstoð vel þegin
Pysjutímabilið stendur nú sem hæst og því mörg horn að líta hjá starfsfólki Pysjueftirlitsins. Vanur starfsmaður getur þrifið 10-12 fugla á dag þannig að verkefnið er ærið og langur dagur fram undan hjá starfsfólki, sem þiggur alla þá aðstoð sem í boði er og hvetjum áhugasama sjálfboðaliða um að gefa sig fram við Pysjueftirlitið. Einnig vantar þau handklæði og tuskur til að nota við þrifin á fuglunum.

Það var starfsfólk við löndun sem veiddi pysjurnar.  „Ég hef unnið þarna í þónokkur ár og hef aldrei séð ástandið svona slæmt, strákarnir í lönduninni veiddu þær upp með háfi þar sem þær voru að reyna að komast upp í grjótið hjá löndunarbryggjunni“ sagði Marta Möller starfsmaður Vinnslustöðvarinnar.

Fiskvinnslufólk vantar
Starfsfólk Vinnslustöðvarinnar kom með tvö kör af olíublautum lundapysjum í Pysjueftirlitið nú í morgun.

Ekki um olíu að ræða
Ólafur Snorrason hafnarstjóri Vestmannaeyjahafnar sagði þá ekki hafa orðið vara við olíu í höfninni. Það var farinn hringur í gær og þá sást enginn olía en við lentum í tilfelli um daginn þar sem flutningaskip losaði sót úr mengunarvarnakerfi hjá sér með þeim afleiðingum að úr varð leiðinlegur flekkur sem einhverjir fuglar lentu í. Það atvik er í ferli með útgerð skipsins. Okkur grunar miðað við aðstæður að hér sé um grút að ræða en ekki hefðbundna olíu en við erum leita upptakanna“ Sagði Ólafur Snorrason hafnarstjóri í Vestmannaeyjahöfn en jafnframt vill hann hvetja notendur hafnarinnar að ganga vel um og passa að óæskileg efni fari ekki í sjóinn.

Þennan grun staðfestir starfsfólk Sea life safnsins sem þykir líkleg eftir frumskoðun að um lífrænan úrgang sé að ræða. Hann hefur eftir sem áður sömu áhrif og önnur olía. Sest í fiðrið með þeim afleiðingum að fuglinn tapar einangrun og verður því ekki lengur vatnsheldur sem leiðir á endanum til þess að hann sekkur eða króknar úr kulda. Einnig er algengt að skaðleg efni setjist í meltinga veginn þegar fuglinn reynir að hreinsa sig sjálfur.

Starfsfólki Pysjueftirlitsins bíður ærið verkefni við hreinsun lundapysjanna.

Skiptir máli hvar er sleppt
Athygli vakti að einn fuglanna bar merki á fæti sem hafði nýlega verið komið fyrir. Starfsfólk Pysjueftirlitsins vill brýna fyrir fólki að sleppa ekki pysjum á Skansinum eða öðrum stöðum á nýja hrauninu þar sem pysjurnar gætu ratað inn í höfnina. Mælt er með að nota staði á Ofanleitishamri eða í Höfðavík.

Jóla smörrebrod

Mest lesið