- Eyjafréttir
- ·
- Goslok
- ·
Nú stefnir í það sem margir myndu kalla hápunkt goslokavikunnar en í kvöld verður leikið fyrir dansi á Skipasandi langt fram á nótt. Þar eiga Mucky Muck, Molda, Leikfélag Vestmannaeyja, Séra Bjössi, Memm og Brimnes eftir að stíga á svið. Eyjafréttir heyrðu í Símoni Geirssyni, einn meðlima rokkhljómsveitarinnar Molda.
Hljómsveitina skipa Tórshamar frændurnir þeir Albert Snær og Helgi Rasmussen, og bræðurnir Símon og Þórir Rúnar Geirssynir. Albert syngur og leikur á gítar, Helgi er aðalgítarleikarinn, Símon spilar á trommur og Þórir, eða Dúni eins og hann er gjarnan kallaður, er bassaleikari sveitarinnar.
„Þetta er bara eins og gott hjónaband. Það kemur fyrir eins og í öllum góðum hjónaböndum að menn takist á og eru ósammála um hluti en við erum allir góðir vinir og eigum það allir sameiginlegt að tónlistargleðin skín alveg frá okkur” segir Símon.
Heiður að fá að spila í Eyjum
„Það er æðislegt að fá að taka þátt í öllu sem gerist hérna í Vestmannaeyjum. Við erum náttúrulega allir Eyjapeyjar og það er mikill heiður að fá að spila heima. Ég veit það er oft erfitt að vera lítil hljómsveit í litlu bæjarfélagi að fá íbúa til þess að hlusta á sig og koma á tónleika en við höfum ekki lent í því í hérna” segir Símon.
„Það leggst mjög vel í okkur að spila á goslokum og við höfum ekki gert það áður. Eða ég vona að ég sé ekki að ljúga, ég held við höfum ekki gert það áður” segir Símon sem hlakkar til kvöldsins.
„Eyjamenn mega búast við okkar allra besta. Við náttúrulega tökum okkar efni og svo tökum við að minnsta kosti tvö tökulög. Eitt þeirra höfum við gefið út, og svo tókum við lag á Skonrokk um daginn eftir Soldogg sem heitir „Svört Sól” sem farnaðist vel þannig fólk má búast við því að fá að heyra það.”
