Nú stendur yfir rýmingarsala hjá Axel Ó við Bárustíg sem hættir rekstri eftir 64 ár í Vestmannaeyjum. Núverandi eigendur, Bára Magnúsdóttir og Magnús Steindórsson, hafa rekið verslunina frá árinu 2000. Axel Ó er elsta skóbúð landsins.

Í tilkynningu í gær senda þau viðskiptavinum og starfsfólki góðar kveðjur. Þau efna til alvöru útsölu og segja gjafabréf og innleggsnótur í fullu gildi. Sportbær á Selfossi og sportbaer.is sem þau reka starfa áfram og er ókeypis heimsending til Vestmannaeyja.

Litla Skvísubúðin mun flytja sig yfir í húsnæðið frá Skólavegi. „Við erum mjög spenntar að flytja á besta stað í bænum. Allt mun þetta gerast í rólegheitunum og taka sinn tíma en við ætlum að gera verslunina aðlaðandi og að okkar. Við náum kannski aldrei að fylla í það skarð sem kemur þegar Axel Ó lokar en við munum gera okkar besta við að veita góða þjónustu með fjölbreyttu vöruúrvali” segir Sigrún Alda Ómarsdóttir, eigandi Litlu Skvísubúðarinnar.

Búðin verður með sama sniði og áður og heldur sínum vörumerkjum en mun bæta við sig einu og öðru. Stefnan sé að bæta við skóm, íþróttafatnaði og einnig við úrvalið af nærfötum.

En hvað með trúðinn?

Eyjafréttir kíktu á rýmingarsöluna í Axel Ó og spurðu hvað skyldi nú verða um Trúðinn, en Bára sagðist einmitt marga hafa haft áhyggjur af honum í dag. Sáluhjálparatriðið sem Trúðurinn er hefur verið hluti af jólunum í Eyjum frá árinu 1965 þar sem hann hefur sýnt listir sínar í glugganum. Sigrún lofar því að hann verði á sínum stað í desember.