Bergur VE landaði fullfermi í Vestmannaeyjum í gær og í dag landar Vestmannaey VE einnig fullfermi. Skipin munu bæði stoppa í landi meðal annars vegna bræluspár. Jón Valgeirsson, skipstjóri á Bergi, sagði í gær, í samtali við heimasíðu Síldarvinnslunnar, að tveggja daga stopp væri framundan. „Það er norðaustan lurkur næstu daga og þá er eins gott að gera smá hlé. Sérstaklega virðist spáin vera leiðinleg austurfrá. Þessi túr gekk alveg þokkalega hjá okkur. Við byrjuðum að veiða á Pétursey og Vík og héldum síðan austur á Ingólfshöfða. Aflinn var mest þorskur og svo dálítið af ýsu. Þetta er fínasti fiskur. Fyrir utan veðurspána er allt gott að frétta,“ sagði Jón.

Birgir Þór Sverrisson, skipstjóri á Vestmannaey, segir að víða hafi verið veitt í þessum túr. „Við byrjuðum á Tangaflaki og síðan var farið á Glettinganesflak og Digranesflak. Þá var keyrt suður í Sláturhús og endað á Ingólfshöfða. Það var alls staðar reytingsafli. Nú verður stoppað í tvo daga. Það er spáð leiðindaveðri austurfrá en gæti verið þolanlegt hér við Eyjarnar. Það er gott að nota brælutíð í að stoppa,“ segir Birgir Þór.