Það var á köflum erfitt að sitja yfir myndinni Djúpið sem var frumsýnd á sunnudaginn í Háskólabíói. Sérstaklega var atriðið þegar báturinn í mynd­inni, Breki VE, festir veiðarfærin í sjávarbotni og að lokum sekkur. Kuldinn nísti inn að beini þegar skipverjarnir lenda í sjónum og sorgin, þegar þeir farast hver á fætur öðrum, var áþreifanleg í salnum. Ungur maður sat við hliðina á mér á frumsýningunni og átti verulega erfitt með að horfa á atriðið. Algjör dauðaþögn var í salnum nema hvað áhorfendur tóku reglulega andköf. Aldrei áður hef ég upplifað önnur eins viðbrögð við atriði í bíómynd og þetta sunnudagskvöld þegar Djúpið var frumsýnt að við­stöddum ríflega eitt þúsund áhorfendum.