Bæjarráð Vestmannaeyja leggur til að útsvarsprósenta sveitarfélagsins verði óbreytt á næsta ári, eða 14,91%. Þetta kom fram við umræðu um ramma og forsendur fjárhagsáætlunar ársins 2027 á fundi ráðsins 6. október. Samkvæmt fundargerðinni er leyfilegt hámark útsvars 14,97%.

Ráðið leggur jafnframt til að við gerð fjárhagsáætlunar verði gert ráð fyrir 3,5% verðlagshækkunum. Í fundargerðinni segir að í því felist töluverð aðhaldskrafa með tilliti til þróunar vísitölu neysluverðs.

Gjaldskrárhækkanir innan 2,5%

Við undirbúning fjárhagsáætlunar lagði bæjarráð þegar í júní til að gjaldskrárhækkanir í A-hluta sveitarfélagsins yrðu ekki hærri en 2,5%. Bæjarstjórn staðfesti þá tillögu í júlí.

Á fundinum voru lögð fram erindi frá verkalýðssamtökum þar sem óskað var eftir afstöðu bæjarins til aðgerða sem gætu stuðlað að lægri verðbólgu, lægri vöxtum og auknum efnahagslegum stöðugleika.

Einnig var lögð fram ályktun Sambands íslenskra sveitarfélaga um vilja til að halda hækkunum almennra gjaldskráa innan 2,5% á árinu 2027. Samhliða er kallað eftir því að ríkið tryggi fullnægjandi fjármögnun verkefna sem sveitarfélögum eru falin.

Bæjarráð telur að með fyrri ákvörðun um hóflegar gjaldskrárhækkanir hafi sveitarfélagið þegar komið til móts við þau sjónarmið sem fram koma í erindunum.

Vinna við fjárhagsáætlun heldur áfram

Bæjarstjóri fór á fundinum yfir óskir sviðsstjóra og forstöðumanna vegna rekstrar og fjárfestinga í fjárhagsáætlun ársins 2027 og þriggja ára áætlun.

Bæjarráð fól bæjarstjóra og sviðsstjórum að vinna áfram að þeim forsendum sem ræddar voru á fundinum.