ÍBV lagði Selfoss að velli á Hásteinsvelli í kvöld en lokatölur urðu 3:0. Öll mörkin komu í fyrri hálfleik þar sem Eyjakonur voru mun sterkari og hefðu í raun getað skorað fleiri mörk. Síðari hálfleikur var hins vegar jafnari og fengu bæði lið færi en mörkin urðu ekki fleiri. Með sigrinum komst ÍBV hins vegar upp að hlið Breiðabliks, sem er í öðru sæti en með betri markatölu en ÍBV. Bæði Breiðablik og Valur töpuðu sínum leikjum í kvöld en Valur er í fjórða sæti, stigi minna en ÍBV og Breiðablik. Baráttan um silfrið harðnaði því til muna í kvöld.