Fræðsluráð Vestmannaeyja hefur óskað eftir drögum að endurskoðaðri gjaldskrá Frístundar. Ákvörðunin kemur í kjölfar heimsóknar ráðsins í Frístund miðvikudaginn 23. september, þar sem rætt var um hvort gjaldskráin kunni að hafa áhrif á skráningu og nýtingu þjónustunnar.

Sigurleif Kristmannsdóttir, deildarstjóri Frístundar, tók á móti ráðinu og kynnti starfsemina, helstu verkefni og aðstöðu. Ráðsfulltrúar ræddu einnig við starfsfólk um þjónustuna og hlutverk Frístundar.

Samkvæmt fundargerð fól ráðið sviðsstjóra fjölskyldu- og fræðslusviðs og deildarstjóra Frístundar að bera gjaldskrána saman við gjaldskrár sambærilegra sveitarfélaga og leggja drög að endurskoðaðri gjaldskrá fyrir næsta fund ráðsins. Þá óskaði ráðið eftir kynningu á gildandi reglum Frístundar og mati á því hvort ástæða sé til að endurskoða þær, meðal annars með hliðsjón af fyrirkomulagi skráninga.