Erfiður leikur bíður kvennaliðs ÍBV í handbolta í kvöld en liðið sækir þá Fram heim í Safamýrina. Liðin eru jöfn að stigum í þriðja og fjórða sæti Olísdeildarinnar en ÍBV er ofar þar sem liðið hafði betur í fyrri viðureign liðanna í Eyjum, 25:20. Eyjakonur sýndu stórleik í síðari hálfleik gegn öðru af toppliðum deildarinnar, Val á laugardaginn og spiluðu líklega bestu 30 mínútur sem liðið hefur gert í langan tíma. Sjálfsagt ætla stelpurnar sér að halda áfram á þeirri braut og bæta jafnvel við en ef þær ná upp sömu vörn og markvörslu, er ljóst að Framliðið er í vanda.

Leikur liðanna hefst klukkan 19:30 í Framhúsinu.